ყველაზე ხშირად ამ შეკითხვის პასუხად მომისმენია, რომ კომპიუტერული მეცნიერება არის მეცნიერება, რომელიც სწავლობს კომპიუტერებს. რაც დაახლოებით იგივეა თქვა რომ ბიოლოგია არის მეცნიერება რომელიც სწავლობს მიკროსკოპებს, ან, ასტრონომია არის მეცნიერება, რომელიც სწავლობს ტელესკოპებს. ცხადია, ეს არასწორი ფორმულირებაა - ასტრონომია გაცილებით მეტია, ვიდრე ტელესკოპები - ასტრონომია არის მეცნიერება სამყაროს შესახებ, რომელიც ტელესკოპების საშუალებით იკვლევს ციურ სხეულებს, მათ განლაგებას, მოძრაობას და ა.შ. ანალოგიურად, კომპიუტერული მეცნიერება არის მეცნიერება, რომელიც კომპიუტერების საშუალებით იკვლევს სამყაროს, კომპიუტერი კი - ხელსაწყო, რომელსაც ამ მიზნით გამოიყენებ.
თუკი შეგიძლია, მინდა მოგილოცო, რადგან შენი ცოდნა და ნიჭი სრულიად საკმარისია იმისათვის, რომ წარმატებული პროგრამიტი გამოხვიდე. გავრცელებულია მცდარი აზრი იმის თაობაზე, რომ კოდის წერა მხოლოდ ღვითით ბოძებული ნიჭის პატრონთ შეუძლიათ, რომ მაინცდამაინც გუგლში უნდა მუშაობდე იმისთვის, რომ კოდი წერო. მალევე დარწმუნდები, რომ კოდის წერა შენც მშვენივრად გამოგდის :).
კომპიუტერული მეცნიერების დეტალური ისტორიით თავს არ შეგაწყენ. ეს ტერმინი მეოცე საუკუნის 50-იანი წლების ბოლოს დამკვიდრდა, მანამდე ყველაფერს მათემატიკა ერქვა. რეალური წინსვლა ამ სფეროში 1971 წელს დაიწყო როდესაც კომპანია ინტელმა პირველი მიკროპროცესორი გამოიგონა. დარგი მეტნაკლებად ახალია და დღესაც ძალიან სწრაფად იცვლება და ვითარდება. 50 წლის წინ ამ მიმართულებით ფაქტობრივად ბევრი არაფერი იყო გაკეთებული. დღეს კი უმრავლესობას ერთი ან რამდენიმე კომპიუტერი აქვს, ზოგი ჯიბით ატარებს(ტელეფონებს), ზოგს მაჯაზე უკეთია(საათები), ზოგს თავად კომიუტერი ატარებს(ტესლას ავტომობილი), ლეპტოპებსა და სტაციონარულ კომპიუტერებზე რომ აღარაფერი ვთქვათ. შეგიძლიათ წარმოიდგინოთ რა იქნება 50 წლის შემდეგ? კომპიუტერების და კომპიუტერული მეცნიერებების წილი ჩვენს ცხოვრებაში დღითიდღე იზრდება და კიდევ უფრო გაიზრდება. ყოველდღიურად ვიყენებთ ისეთი კომპანიების პროდუქტრებს, როგორებიც არიან Google, Facebook, Apple და ა.შ. ცხადია, ტექნოლოგიური ზრდა ჩვენს ცხოვრებაზე დიდ გავლენას ახდენს. ავიღოთ თუნდაც კომუნიკაცია. შეგვძლია ნებისმიერ დროს დედამიწის ნებისმიერ წერტილში ნებისმიერი ინფორმაცია გადავცეთ მეგობარს. ამ შესაძლებლობებს ცოტა თუ წარმოიდგენდა ერთი საუკუნის წინ.
კომპიუტერული მეცნიერება დღესაც განვითარების აქსელერაციის ფაზაშია. რაც თავის მხრივ იმას ნიშნავს რომ თუკი დღეს ვითარდება 1-ით ხვალ განვითარდება 2-ით, ზეგ 4-ით, მაზეგ 8-ით და ა.შ. - ექპონენციალურად. ამ განვითარებას ჯერჯერობით ბოლო არ უჩანს. ცხადია, ეს იმას ნიშნავს, რომ საქმეების რაოდენობა, რომლებიც კომპიუტერულ მეცნიერებაში გვხვდება ასევე ექსპონენციალურად იზრდება, რასაც ვერ ვიტყვით ადამიანების რაოდენობაზე, რომლებიც ამ სფეროში მოღვაწეობენ. სწორედ ამიტომ, სამუშაო კომპიუტერული მეცნიერებების სფეროში ყოველთვის უფრო მეტია ვიდრე ამ სფეროს სპეციალისტები, შესაბამისად, ხელფასები გამუდმებით იზრდება და დასაქმების პრობლემაც არ არის.
ძალიან კარგი იქნებოდა თუ ყველა, ვინც ამ კურსს გაივლის კომპიტერული მეცნიერი, კომპიუტერული ინჟინრი, პროგრამისტი თუ გამოვა. თუმცა, ეს კურსი არ არის განკუთვნილი მხოლოდ იმ ადამიანებისთვის, ვინც პროგრამისტობას აპირებს. სრულიად პირიქით, დღეს პროგრამირება ისეთივე აუცილებელი ცოდნაა, როგორიც გამრავლება-გაყოფის თუ წერა-კითხვის. რატომ უნდა იცოდეს პროგრამირება ყველამ? ამისთვის ბევრი მიზეზია, თუმცა შევეცდები მოკლედ მოგიყვე - ერთერთი ყველაზე მნიშვნელოვანი ფაქტორი არის ავტომატიზაცია. კომპიუტერული მეცნიერება და ზოგადად ტექნოლოგიების განვითარება მასიურად სპობს სამსახურებს(ცხადია გაცილებით მეტს ქმნის ვიდრე აქრობს). ამიტომ უნდა დაფიქრდე - 20 წლის შემდეგ იარსებებს თუ არა ის პროფესია, რომელიც გაქვს ან მომავალში გინდა რომ შეიძინო. როგორც კვლევები აჩვენებს 20 წელიწადში საქმეების ნახევარი უკვე აღარ იქნება. მაგალითად, აღარ იქნებიან მძღოლები, ამიტომ ორი დიპლომი ტაქსისტობაში ვეღარ დაგეხმარება :), აღარ იქნებიან საკრედიტო ექსპერტები ბანკში, რადგან პროგრამას გაცილებით უკეთ შეუძლია შეაფასოს რისკები და გააკეთოს პროგნოზები, აღარ იქნებიან სატელეფონო ოპერატორები, რადგან ხელოვნური ინტელექტი მარტივად გაიგებს შენს პრობლემას და დაგეხმარება მის მოგვარებაში, აღარ იქნებიან რადიოლოგები, რადგან ხელოვნური ინტელექტი შეძლებს დაგისვას ზუსტი დიაგნოზი შენი მონაცემების მიხედვით. ამ ლინკზე (https://www.replacedbyrobot.info) შეგიძლია ნახო იმ პროფესიების სია, რომლებსაც ახლო მომავალში კომპიუტერული მეცნიერება ჩაანაცვლებს. იმის და მიუხედავად მოგვწონს ეს თუ არა, ყველაფრის ავტომატიზირება ხდება. ავტომატიზაციის მიზეზი ადვილი მისახვედრია - ეს გვიზოგავს დროს, დრო კი მნიშვნელოვანი ვალუტაა. პროგრამირება გვეხმარება მოვახდინოთ ჩვენი საქმიანობის ავტომატიზაცია და შესაბამისად დავზოგოთ დრო.
მაგალითად, თუკი გაქვთ ისეთი საქმე, რომლის კეთებაც ხშირად გიწევთ და ამ საქმეს სჭირდება x წუთი, შეგიძლია ეს დრო ისეთი პროგრამის წერაზე დახარჯო, რომელიც ამ საქმის ავტომატიზაციას მოახდენს და შემდეგ შეასრულებს. ავტომატიზაცია კი, ფაქტობრივად, ნებისმიერი საქმის - დაახლოებით 90%-ის მაინც - შეიძლება და თქვენც აუცილებლად შეძლებთ გახდეთ ავტომატიზაციის ნაწილი, იმ ეპოქის - რომელიც უკვე დადგა.
მეორე მიზეზი რატომაც მნიშვნელოვანია პროგრამირების ცოდნა არის ხელსაწყოების ე.წ. დევაისების ზრდის ტემპი. იმის გამო, რომ "ტექნოლოგიები" ყოველ წელს იაფდება 1000 განსხვავებულ ხელსაწოს იგონებენ ხოლმე და თითოეული რეალურად კომპიუტერია. დღეს თუ ტელეფონი, ლეპტოპი და საათია ის კომპიუტერები რომლებსაც ყოველდღიურად ვიყენებთ, ხვალ ბევრად უფრო მეტი იქნება. მანქანა რომელსაც გაატარებ კომპიუტერი იქნება, სახლი, მადუღარა, საწოლი, სკამი,... კომპიუტერებით იქნები გარშემორტყმული, ამ ხელსაწყოების მოხმარება, მათთან კომუნიკაცია მოგიწევს. კომპიუტერთან ყველაზე მარტივად საურთიერთო ენა კი პორგრამირებაა.
ხვალ, კომპიუტერული მეცნიერება დაგჭირდება აბსოლუტურად ყველა სფეროში. მაგალითად, მალე იმისათვის, რომ ელემენტარული სახაჭაპურე ბიზნესი გააკეთო, მოგიწევს დაიქირაო არა მზარეული, რომელიც კარგ ხაჭაპურს აცხობს, არამედ, გააკეთო რობოტი, რომელსაც ასწავლი კარგი ხაჭაპურის გამოცხობას. ასეთი იქნება ხვალინდელი ცხოვრება.
და ბოლოს, რომ შევაჯამოთ, პროგრამირება არის ყველაზე მნიშვნელოვანი ცოდნა, რაც ოცდამეერთე საუკუნეში შეიძლება ადამიანმა შეიძინოს.